குழந்தைகள் இயக்க அறிவியல் மாநாடுவழிகாட்டி

ஜூலை 29,2010,03:06 IST

திருப்பூர்:தேசிய குழந்தைகள் இயக்க அறிவியல் மாநாட்டில் பங்கேற்கும் மாணவர்களுக்கு உதவும் வழிகாட்டி ஆசிரியர்களுக்கான ஒரு நாள் பயிற்சி முகாம், காங்கயம் ராஜராஜேஸ்வரி மெட்ரிக் மேல்நிலைப்பள்ளியில் வரும் 31ல் நடக்கிறது.தமிழ்நாடு அறிவியல் இயக்க மாவட்ட ஒருங்கிணைப்பாளர் ஈஸ்வரன் வெளியிட்டுள்ள அறிக்கை:தேசிய அறிவியல் மற்றும் தகவல் தொழில்நுட்ப கவுன்சில் சார்பாக, 1993 முதல் தேசிய குழந்தைகள் அறிவியல் மாநாடு நடத்தப்படுகிறது. இந்தாண்டு வரும் டிச., 27 முதல் 31 வரை ஹரியானா மாநிலம் குருஷேத்ராவில் நடக்கிறது.நில வளம் என்ற தலைப்பில் இந்தாண்டு மாநாடு நடத்தப்படுகிறது. இதில், ஆறு முதல் பிளஸ் 2 வகுப்பு வரையிலான மாணவ, மாணவியர் பங்கேற்கலாம்.

ஒரு வழிகாட்டி ஆசிரியரின் ஒத்துழைப்புடன் மாணவர்கள் ஆய்வை மேற்கொண்டு, ஆய்வறிக்கை தயார் செய்ய வேண்டும். மாவட்ட அளவிலும், மாநில அளவிலும் நடக்கும் மாநாட்டில் தேர்வு செய்யப்படும் ஆய்வுக்கட்டுரைகள், அகில இந்திய மாநாட்டில் பங்கேற்க வாய்ப்பு அளிக்கப்படும்.ஒவ்வொரு மாநிலத்தில் இருந்தும் மிக சிறந்த இரண்டு ஆய்வு கட்டுரைகள், இந்திய விஞ்ஞானிகள் மாநாட்டில் பங்கேற்று சமர்பிக்கப்படும்.இம்மாநாட்டுக்கு மாணவர்களை தயார் செய்ய உதவும் வழிகாட்டி ஆசிரியர்களுக்கான ஒரு நாள் பயிற்சி முகாம், காங்கயம் ராஜராஜேஸ்வரி மெட்ரிக் மேல்நிலைப்பள்ளியில் வரும் 31ம் தேதி காலை 10.00 மணி முதல் மாலை 4.00 மணி வரை நடக்கிறது. மேலும் விபரங்களுக்கு 94430 - 24086 என்ற எண்ணில் தொடர்பு கொள்ளலாம். இவ்வாறு, அறிக்கையில் தெரிவிக்கப்பட்டுள்ளது.

நன்றி: தினமலர்

தேசிய குழந்தைகள் அறிவியல் மாநாடு

ஆகஸ்ட் 31,2010,02:30 IST

ராசிபுரம்: மாவட்ட தமிழ்நாடு அறிவியல் இயக்கம் சார்பில், தேசிய குழந்தைகள் அறிவியல் மாநாடு மற்றும் மாவட்ட வழிகாட்டி ஆசிரியர்கள் பயிற்சி முகாம் ராசிபுரம் வித்யா மந்திர் பள்ளியில் நடந்தது. மாவட்டத் தலைவர் தெய்வசிகாமணி தலைமை வகித்தார். பள்ளி தலைவர் ஆடிட்டர் சேகர், செயலாளர் ராமசாமி, பொருளாளர் சுந்தரராஜன், முதல்வர் கிருஷ்ணராஜ் ஆகியோர் முன்னிலை வகித்தனர். மாவட்ட முதன்மை கல்வி அலுவலர் மல்லிகா, மாநாட்டை துவக்கி வைத்து பேசினார். அரசு மற்றும் தனியார் பள்ளிகளில் பணியாற்றும் ஆசிரியர்கள், மாணவர்கள் என 200க்கும் மேற்பட்டோர் பங்கேற்றனர். மாநில செயற்குழு உறுப்பினர்கள் சேதுராமன், சுரேஷ், மாவட்ட ஒருங்கிணைப்பாளர் கிருஷ்ணமூர்த்தி, சுற்றுச்சூழல் ஒருங்கிணைப்பாளர் மகேஷ்குமார், மாவட்டத் தலைவர் கார்த்திகேயன் உள்பட பலர் பங்கேற்றனர்.

நன்றி: தினமலர்

இளம் விஞ்ஞானிகள் மாநாடு

ஆகஸ்ட் 19,2010,23:01 IST

சிவகங்கை : அறிவியல் இயக்கம் சார்பில், இளம் விஞ்ஞானிகள் மாநாடு நடக்கவுள்ளது.

மாவட்ட தலைவர் ரகுபதி, ஒருங்கிணைப்பாளர் சிவக்குமார் கூறியதாவது: 10 முதல் 17 வயதிற்கு உட்பட்ட மாணவர்களிடையே அறிவியல் ஆர் வத்தை தூண்டும் வகையில், தேசிய குழந்தைகள் அறிவியல் மாநாடு நடத்தப்படுகிறது. தமிழகத்தில் நடக்கும் இம்மாநாட்டிற்கான ஆய்வு தலைப்பு, "நிலவளம்'. அதில் "வளமைக்காக பயன்படுத்துவோம்; வரும் தலைமுறைக்காகவும் பாதுகாப்போம்' என்ற பொருளை மையமாக வைத்து ஆய்வு கட்டுரைகள் தயாரிக்க வேண்டும். ஆறு முதல் எட்டாம் வகுப்பு வரை இளநிலை மாணவர் பிரிவு; ஒன்பது முதல் பிளஸ் 2 வரை சீனியர் பிரிவுகளில் தலா ஐந்து பேர் கொண்ட குழுவினர் பங்கேற்கலாம்.

இம்மாணவர்களுக்கு இளம் விஞ்ஞானிகள் விருது, வழிகாட்டி ஆசிரியர்களுக்கு பாராட்டு சான்று வழங்கப்படும். பள்ளிக்கு ஒரு அறிவியல் ஆசிரியர் பங்கேற்கலாம் என்றனர்.

நன்றி: தினமலர்

தேசிய குழந்தைகள் அறிவியல் மாநாடு

அக்டோபர் 22,2010,00:00 IST

காரைக்கால்:காரைக்கால் முதன்மைக் கல்வி அலுவலர் அலுவலகத்தில் தேசிய குழந்தைகள் அறிவியல் காங்கிரஸ் 18வது மாநாடு நடந்தது.இம்மாநாடு குறித்து மாவட்ட முதன்மை கல்வி அதிகாரி தர்மராஜ் கூறியதாவது:காரைக்காலில், தேசிய குழந்தைகள் அறிவியல் காங்கிரஸ் மாநாட்டையொட்டி, 6 வயது முதல் 14 வயது வரையிலான மாணவ, மாணவியர் 2500 வார்த்தையிலும், 14 முதல் 17 வயது வரையிலான மாணவ, மாணவியர் 3500 வார்த்தைகளிலும் மண் வளம் குறித்து ஆய்வுக் கட்டுரை தயாரித்து சமர்ப்பிக்கும்படி @கட்டுக்கொள்ளப்பட்டிருந்தது.

அதன்படி 30 அரசு மற்றும் தனியார் பள்ளிகளைச் சேர்ந்த 200 மாணவர்கள் தங்கள் ஆய்வுக் கட்டுரைகளை வழங்கினர். மாணவ, மாணவியர்களின் ஆய்வுக் கட்டுரைகளை புதுச்சேரி சி.இ.ஆர்.பி., அமைப்பின் தலைவர் ரகுநாத், செயலர் விஜயமூர்த்தி, சுதர்சன் ஆகியோர் ஆய்வு செய்து, 6 சிறந்த கட்டுரையாளர்களை தேர்வு செய்ய உள்ளனர்.அந்த 6 கட்டுரையாளர்களும் அடுத்த மாதம் புதுச்சேரியில் நடைபெறும் மாநில மாநாட்டில் கலந்து கொள்வார்கள்.அதன்பின் தேர்வு செய்யப்படுவோர் சென்னையில் நடைபெறும் அகில இந்திய அளவிலான மாநாட்டில் பங்கேற்பர்.

சென்னை மாநாட்டில் சிறந்த கட்டுரைகள் தேர்வு செய்யப்பட்டு, இளம் விஞ்ஞானி உள்ளிட்ட விருதுகளுடன் அரசு வேலைக்கும் ஏற்பாடு செய்யப்படும்.மாநாடு ஏற்பாடுகளை புதுச்சேரி அறிவியல் இயக்கத் தலைவர் சம்பந்தம், நிர்வாகிகள் விஸ்வேஸ்வரமூர்த்தி, ஒருங்கிணைப்பாளர் பால்ராஜ் உள்ளிட்டோர் செய்தனர்.

நன்றி: தினமலர்

கோவையில் குழந்தைகளுக்கான அறிவியல் மாநில மாநாடு

அக்டோபர் 25,2010,01:10 IST

தினமலர்

சூலூர்: "குழந்தைகளுக்கான அறிவியல் மாநில மாநாடு, கோவையில் வரும் டிச.,ல் நடக்கிறது. மத்திய அரசின் அறிவியல் தொழில் நுட்பத்துறை மற்றும் தேசிய அறிவியல் தொழில் நுட்ப பரிமாற்ற குழு இணைந்து, ஆண்டு தோறும் தேசிய குழந்தைகள் அறிவியல் மாநாட்டை நடத்துகின்றன. தமிழ்நாட்டில், "தமிழ்நாடு அறிவியல் இயக்கம்' மாநாட்டு பணிகளை ஒருங்கிணைத்து செயல்படுத்த உள்ளது. பள்ளி மாணவர்கள் குழு வாரியாக தங்களின், அறிவியல் ஆய்வுக்கட்டுரைகளை மாவட்ட, மாநில வாரியாக சமர்ப்பிப்பார்கள். மாநில அளவில் தேர்வு செய்யப்படும் கட்டுரைகள் தேசிய குழந்தைகள் அறிவியல் மாநாட்டில் சமர்ப்பிக்கப்படும். வரும் டிச., 26 முதல் 31 வரை 18வது தேசிய குழந்தைகள் அறிவியல் மாநாடு சென்னையில் நடக்கிறது. "நில வளம்- வளமைக்காக பயன்படுத்துவோம், வரும் தலைமுறைக்காகவும் பாதுகாப்போம்' என்ற கருப்பொருள் மாநாட் டில் முக்கிய ஆய்வாக எடுத்துக் கொள்ளப் படும். தமிழ்நாடு அறிவியல் இயக்கத்தின் சார்பில், வரும் டிச., 3 முதல் 5ம் தேதி வரை அரசூர் கே. பி. ஆர்., பொறியியல் கல்லூரியில் மாநில மாநாடு நடக்கிறது.

மாநாட்டு ஏற்பாடுகள் குறித்த ஆலோசனை மற்றும் வரவேற்பு குழு கூட்டம் கல்லூரி வளாகத்தில் நடந்தது. கல்லூரி மேலாண்மை இயக்குனர் சிகாமணி தலைமை வகித்தார். கல்லூரி முதல்வர் அருள்ஸ்ரீ வரவேற்றார். தமிழ்நாடு அறிவியல் இயக்க மாவட்ட செயலர் பாதுஷா பேசியதாவது: நவ.,ல் நடைபெறும் கோவை மாவட்ட மாநாட்டில் 2000 க்கும் அதிகமான ஆய்வு கட்டுரைகள் சமர்ப்பிக்கப்படும். மாநாட்டில் 10,000 மாணவர்கள், 2,000 ஆசிரியர்கள் பங்கேற்கின்றனர். அரசு பள்ளிகள், மெட்ரிக் பள்ளிகள் மற்றும் சி. பி. எஸ். இ., என 1,500 பள்ளிகள் பங்கேற்கின்றன. ஆறாம் வகுப்பு முதல் 12ஆம் வகுப்பு வரை பயிலும் மாணவர்கள் ஆய்வு மேற்கொள்கின்றனர். மாநில அளவில் தேர்வு செய்யப்படும் 200 ஆய்வுகளில், 30 கட்டுரைகள் தேசிய மாநாட்டுக்கு தேர்வு செய்யப்படும். மாநாட்டில், விஞ்ஞானிகள் மற்றும் அரசு அதிகாரிகளுடன் கலந்துரையாடல், சாதனையாளர்களுடன் சந்திப்பு உள்ளிட்ட நிகழச்சிகள் நடக்கிறது. கணித விளையாட்டுகள், எளிய அறிவியல் பரிசோதனைகள், தொலைநோக்கி வழியே இரவு வான் என 9 அரங்குகளில் மாணவர்களுடன் விஞ்ஞானிகள் சந்திப்பு நடக்கிறது. மேலும், ஆசிரியர்களுக்காக கற்றல் கற்பித்தல் குறித்த அரங்குகள் மற்றும் பள்ளி மாணவர்கள் காணும் வகையில், மாவட்டங்களின் கலை நிகழ்ச்சிகள், அறிவியல் கண்காட்சி நடக்கிறது. மாநாடு ஒட்டி இன்ஜி., கலை அறிவியல் கல்லூரி மற்றும் பள்ளி மாணவர்களுக்கான கருத்தரங்குகள் நடைபெறும். இவ்வாறு, பாதுஷா பேசினார். நிகழ்ச்சியில், அண்ணா பல்கலை முனைவர் விக்கிரமன், தேசிய குழந்தைகள் அறிவியல் மாநாட்டின் மாநில ஒருங்கிணைப்பாளர் மாதவன், மாவட்ட தலைவர் நடராஜன் கல்லூரி முதன்மை செயல் அலுவலர் தனபால் உட்பட அறிவியல் இயக்க நிர்வாகிகள் பலர் பங்கேற்றனர்.

நன்றி: தினமலர்

காரைக்காலில் தேசிய குழந்தைகள் அறிவியல் மாநாடு

தினமணி

22 Oct 2010 01:17:58 PM IST

காரைக்கால், அக். 21: காரைக்காலில் தேசிய குழந்தைகள் அறிவியல் மாநாட்டு வியாழக்கிழமை நடைபெற்றது. இதில், அரசு, தனியார் பள்ளி மாணவர்கள் தயார் செய்திருந்த மண் வளம் குறித்த ஆய்வுக் கட்டுரை சமர்ப்பிக்கப்பட்டது.

தேசிய குழந்தைகள் அறிவியல் காங்கிரஸ் 2010 என்ற மாவட்ட அளவிலான அறிவியல் மாநாடு மாவட்ட முதன்மைக் கல்வி அலுவலர் அலுவலக வளாகத்தில் நடைபெற்றது. மாநாட்டை முதன்மைக் கல்வி அலுவலர் எஸ். தர்மராஜ் தொடக்கிவைத்தார்.

இந்த மாநாட்டில் மண்ணின் தரம், எந்தெந்த தாவரம் பயிரிட முடியும் உள்ளிட்ட பல்வேறு விளக்கங்களுடன் கட்டுரைகளை ஆய்வுக் குழுவினரிடம் மாணவர்கள் அளித்தனர். காரைக்காலில் 30 பள்ளிகளில் இருந்து சுமார் 200 மாணவ, மாணவிகள் கலந்து கொண்டு, கட்டுரைகளில் கூறப்பட்டுள்ள விவரங்களை விளக்கினர். முதன்மைக் கல்வி அலுவலர் எஸ். தர்மராஜ் பேசும்போது, இந்த மாநாட்டில் தேர்வு செய்யப்படும் கட்டுரைகள் அடுத்த மாதம் புதுச்சேரியில் நடைபெறவுள்ள மாநில அளவிலான மாநாட்டுக்கு அனுப்பப்படும். மாநில அளவில் தேர்வு செய்யப்படுவோர் சென்னையில் நடைபெறவுள்ள தேசிய அளவிலான மாநாட்டில் பங்கேற்பர். இவர்களுக்கு இளம் விஞ்ஞானி உள்ளிட்ட பல விருதுகளும், வேலைவாய்ப்புக்குரிய முன்னுரிமையும் கிடைக்கும் என்றார்.

மாநாட்டில் பேராசிரியர் சம்பந்தன், விஸ்வேஸ்வரமூர்த்தி, சிஇஆர்பி அமைப்பின் தலைவர் ரகுநாத், விஜயமூர்த்தி, சுதர்ஸன் உள்ளிட்டோர் கலந்து கொண்டனர்.

18-வது தேசிய குழந்தைகள் அறிவியல் மாநாடு

கம்பம், ஜூலை 23: தேசிய குழந்தைகளுக்கு நடத்தப்படும் அறிவியல் மாநாட்டிற்கு தலைப்புகளை அறிவியல் இயக்கம் அறிவித்துள்ளது.
குழந்தைகளிடையே இயல்பாக உள்ள ஆய்வு மனப்பான்மையையும், படைப்புத் திறனையும் வெளிகொண்டு வரும் விதமாக தேசிய குழந்தைகள் அறிவியல் மாநாடு 1993-ம் ஆண்டு முதல் நடைபெற்று வருகிறது. மத்திய அரசின் அறிவியல் மற்றும் தொழில் நுட்பத்துறை, தேசிய தகவல் மற்றும் அறிவியல் தொழில்நுட்பப் பரிமாற்றக்குழு ஆகியவற்றோடு இணைந்து தமிழ்நாடு அறிவியல் இயக்கம் இம்மாநாட்டை நடத்தி வருகிறது.

இந்த 18-வது தேசிய குழந்தைகள் அறிவியல் மாநாட்டில் 10 முதல் 13 வயதுள்ள குழந்தைகளும், 14 முதல் 17 வயதுள்ள பள்ளிக் குழந்தைகள் 2 பிரிவுகளாகப் பிரிக்கப்பட்டு ஆய்வுக் கட்டுரைகளைத் தயார் செய்யலாம். இதில் இந்தாண்டு கருப்பொருளாக நிலவளம்-வளத்திற்காகப் பயன்படுத்துவோம், வருங்காலத்திற்காகவும் பாதுகாப்போம் என அறிவிக்கப்பட்டுள்ளது. உபதலைப்பாக, நிலத்தின் செயல்பாடுகள், நிலத்தின் தரம், நிலத்தில் மனிதனால் மேற்கொள்ளப்படும் செயல்பாடுகள், நிலவளத்தின் நிலைத்தகு பயன்பாடுகள், நிலத்தை பயன்படுத்துவது பற்றிய சமூக அறிவு ஆகியன அறிவிக்கப்பட்டுள்ளன.
இதில் கலந்து கொள்ளும் மாணவர்கள் பெயர் பதிவு ஆகஸ்ட் முதல் வாரத்தில் துவங்கும். பதிவு செய்யப்பட்டவர்கள் மட்டுமே மாநாட்டில் கலந்து கொள்ள முடியும். மாவட்ட அளவில் அக்டோபரிலும், மாநில அளவில் நவம்பரில் கோவையிலும், தேசிய அளவில் டிசம்பர் மாதம் ஹரியானா மாநிலத்திலும் மாநாடு நடைபெற உள்ளது.

மாநாட்டில் பங்கேற்கும் அனைவருக்கும் சான்றிதழ் வழங்கப்படும். சிறந்த ஆய்வு புரிந்தவருக்கு இளம் விஞ்ஞானி விருது குடியரசு தலைவரால் வழங்கப்படும் என்று தமிழ்நாடு அறிவியல் இயக்கம் தெரிவித்துள்ளது.

இதுபற்றி தமிழ்நாடு அறிவியல் இயக்கத்தின் மாவட்ட ஒருங்கிணைப்பாளரும், ஆசிரியருமான எஸ்.சுந்தர் கூறியதாவது:
தேசிய குழந்தைகள் அறிவியல் மாநாட்டில் கடந்தாண்டு தேனி, காஞ்சிபுரம் மாவட்டங்களைச் சேர்ந்த 2 மாணவர்கள் இளம் விஞ்ஞானி விருதைப் பெற்றனர். இந்தாண்டு அதிக அளவில் மாணவர்கள் பங்கேற்கும் விதத்தில் பள்ளி ஆசிரியர்களுக்கும், மாணவர்களுக்கும் வழிகாட்டிப் புத்தகங்கள் வழங்க உள்ளதாகவும் தெரிவித்தார்.

நன்றி: தினமணி